Yon ti lizyè

Yon ti lizyè ki separe lakou lakay ak lakou kay sòt

Yon ti lizyè ki pa trò ro, ni ki pa trò ba, li ròtè yon pòt

Yon ti lizyè ki pa menm bann yon chans wè sa kap pase kay vwazen

Yon ti lizyè ki separe chato vwazen ak kay pam ki pa trò lwen

Men fòk ou ta di se yon etènite, se yon gwo osean ki separe nou

Lakay vwazen la pli ap tonbe, nou wè bèl ti kanna kap jwen nan ma labou

Pou tan bò la kay an nou se yon toubiyon pousyè  ki sòti pou asfiksye nou

Poutan se yon ti lizyè, yon ti lizyè, yon ti lizyè tou piti ki separe nou

De twa ti boujon mayi ke nou plante, yo pa ka leve

Paske bò lakay, malgre ke se yon ti lizyè ki separe nou, la pli pa janm tonbe

Lakay vwazen solèy la klere poutan se yon ti lizyè ki separe nou wi

Men lakay pam wa di se kote kat mare twa, tèleman jwèt la di

Fòk ou ta di se kote ki gen lanmò, figi lakay sanble ak tristès makiye

Mwen tande kay vwazen chodyè kap fri, mwen pran sant bon manje

Poutan lòt bò lizyè nou gen sèt kòd ki mare vant

Tankou yon bourik mal sele ki pral monte yon pant

Timoun yo ap gadem, adye, mwen pa ka di yo anyen

Timoun yo ap gadem,  yap gadem epi yo tout ap plenyen

Keksyon ke map poze tèt mwen, eske se yon istwa map janm ka konprann

Nap monte le syèl pa do, eske se yon istwa nan lekòl nou ka aprann